కరోనా పద్యాలు

కంద!!
పనిమనిషి రాదు ఈనెల
పనులెట్ల జరుగునంటూ భయపడవద్దోయ్!
ధనవంతురాలు కత్రిన
తనగిన్నెలు తానెతోమె తర్కింపంగన్!!

కంద||
ఇదివేసవి, సెలవుదినం
పద ఈత కొలను కెల్దము పదపదమంటూ
మదిలోన మురిసినంతన
విధి మనతో ఆటలాడె, విషవైరసుతో!

తేటగీతి:
రోజు రోజుకు పెరిగెను రోగమనుచు
చావు వార్తలు తెగజూచి జడవవనేల?
చేదు విషయము మదినిండ జేర్చినంత
ఫలము శూన్యము, కలుగును భయము నీకు.

తేటగీతి:
ఇదియె చక్కని అవకాశ మెంచి చూడ 
ఇంటిపట్టున నుండొచ్చు ఇంతి తోడ
నీకు నచ్చిన విద్యను నేర్వ వచ్చు

నేర్పు, నైపుణ్యముల పెంచు ఓర్పు తోడ.